భాగమతి..భలేభలే

జేజేమ్మ మరోసారి మెరిసింది. ఈసారి భాగమతిగా..అరుంధతి, రుద్రమదేవి, పంచాక్షరి..బాహుబలి..ఈ హిట్‌ లిస్టులో ఇప్పుడు భాగమతి కూడా చేరింది. ఇప్పుడు హీరోయిన్లలో అనుష్కకు మంచిన నటి లేదనడంలో సందేహం లేదు. కొత్త కథలతో లేడీ ఓరియెంటెడ్‌ చిత్రాలకు బ్రాండ్‌ అంబాసిడర్‌గా మారిపోయింది. అనుష్క లీడ్‌ రోల్‌ లో తెరకెక్కిన థ్రిల్లర్‌ మూవీ భాగమతి. పిల్ల జమీందార్‌, సుకుమారుడు లాంటి క్లాస్‌ సినిమాలను తెరకెక్కించిన అశోక్‌ తొలిసారిగా తన స్టైల్‌ మార్చి చేసిన సినిమా భాగమతి. అనుష్కను భాగమతిగా చూపించిన దర్శకుడు అశోక్‌ సక్సెస్‌ సాధించాడు. ఇటీవల లుక్‌ విషయంలో విమర్శలు ఎదుర్కొంటున్న అనుష్క ఈ సినిమాతో లుక్స్‌ పరంగా ఆకట్టుకుంది. భారీ అంచనాల మధ్య ప్రేక్షకుల ముందుకు వచ్చిన భాగమతి అందరూ ఊహించినట్టే బాక్సాఫీసు వద్ద అంచనాలు అందుకుంది. 

కథ : 
సెంట్రల్‌ మినిస్టర్‌ ఈశ్వర్‌ ప్రసాద్‌ (జయరామ్‌) నిజాయితీ గల రాజకీయనాయకుడిగా ఆయనకు ఉన్న ఇమేజ్‌ చూసి ఆయన రాజకీయ ప్రత్యర్థులు ఎలాగైన ఈశ్వర్‌ ప్రసాద్‌ను కట్టడి చేయాలని భావిస్తారు. అందుకోసం ఎలాగైన ఈశ్వర్‌ ప్రసాద్‌ అవినీతి పరుడని నిరూపించాలని.. ఆ బాధ్యతను సీబీఐ జాయింట్‌ డైరెక్టర్‌ వైష్ణవి నటరాజన్‌(ఆశా శరత్‌)కు అప్పగిస్తారు. వైష్ణవి ఈశ్వర్‌ ప్రసాద్‌ను ఇరికించేందుకు ఆయన దగ్గర రెండు సార్లు సెక్రటరీగా పనిచేసిన చెంచలా ఐఏఎస్‌ (అనుష్క)ను విచారించాలని నిర్ణయించుకుంటుంది. తన ప్రియుడ్ని చంపిన కేసులో జైల్లో ఉన్న చెంచలను ప్రజల మధ్య విచారించటం కరెక్ట్‌ కాదని, ఊరికి దూరంగా అడవిలో ఉన్న భాగమతి బంగ్లాలో విచారించాలని నిర్ణయిస్తారు. బంగ్లాలోకి ఎంటర్‌ అయిన తరువాత చంచల వింతగా ప్రవర్తిస్తుంది. తనను ఎవరో కొడుతున్నారని అరుస్తూ, అప్పుడప్పుడూ అరబిక్‌ భాషలో మాట్లాడుతూ పోలీసులను భయపెడుతుంది. చెంచల అలా ప్రవర్తించడానికి కారణం ఏంటి..? మినిస్టర్‌ ఈశ్వర్‌ ప్రసాద్‌ విూద మచ్చ వేయాలన్న కుట్ర ఎందుకు జరిగింది..? చెంచల తన ప్రియుడ్ని ఎందుకు చంపాల్సి వచ్చింది..? ఈ సమస్యల నుంచి చెంచల ఎలా బయటపడింది..? అన్నదే మిగతా కథ. 

అనుష్క నటన హైలెట్‌ 
అరుంథతి, రుద్రమదేవిగా చరిత్ర సృష్టించిన అనుష్క భాగమతి మరోసారి అదే స్థాయి పర్ఫామెన్స్‌తో ఆకట్టుకుంది. ఐఏఎస్‌ ఆఫీసర్‌ చెంచలగా హుందాగా కనిపించిన స్వీటీ, భాగమతిగా రౌద్ర రసాన్ని కూడా అద్భుతంగా పలికించింది. భాగమతి గెటప్‌లో అనుష్క మరోసారి అరుంధతి సినిమాని గుర్తు చేసింది. మినిస్టర్‌ ఈశ్వర్‌ ప్రసాద్‌ పాత్రలో జయరామ్‌ ఆకట్టుకున్నాడు. 

గత ఏడాది చిత్రాంగద లాంటి థ్రిల్లర్‌ సినిమాతో ప్రేక్షకుల ముందుకు వచ్చిన అశోక్‌ ఈ ఏడాది, అనుష్క లీడ్‌ రోల్‌లో తెరకెక్కిన భాగమతి సినిమాతో మరోసారి ఆకట్టుకునే ప్రయత్నం చేశాడు. సినిమా ఎనౌన్స్‌మెంట్‌ దగ్గర నుంచే భారీ ప్రచారం లభించటంతో అదే స్థాయిలో అంచనాలు కూడా ఏర్పడ్డాయి. ఆ అంచనాలు అందుకునే స్థాయి భాగమతిని తీర్చి దిద్దాడు అశోక్‌. భారీ కథ కాకపోయినా.. అద్భుతమైన టేకింగ్‌, థ్రిల్లింగ్‌ విజువల్స్‌లో ఆడియన్స్‌ను కట్టి పడేశాడు. ముఖ్యంగా భాగమతి బంగ్లాలో జరిగే సన్నివేశాలు వావ్‌ అనిపిస్తాయి. ఫ్లాష్‌ బ్యాక్‌ ఎపిసోడ్‌ పార్ట్‌లు పార్ట్‌ లుగా రావటం. కొన్ని జరగని సన్నివేశాలు జరిగినట్టుగా భ్రమ కలిగించటంతో ఆడియన్స్‌ కాస్త తికమక పడే అవకాశం ఉంది. సినిమాకు మరో మేజర్‌ ప్లస్‌ పాయింట్‌ తమన్‌ మ్యూజిక్‌, తమన్‌ అందించిన బ్యాక్‌ గ్రౌండ్‌ స్కోర్‌ సీన్స్‌ను మరింతగా ఎలివేట్‌ చేసింది. మది సినిమాటోగ్రాఫి కూడా సినిమాను మరో మెట్టు ఎక్కించింది. ఎడిటింగ్‌, నిర్మాణ విలువలు సినిమా స్ధాయికి తగ్గట్టుగా ఉన్నాయి.